Gastronomia de Galicia 

Protagonistas

 

<< volver

Queixo do Cebreiro

 


A orixe do queixo Cebreiro atribúeselle aos primeiros monxes que se instalaron no poboado de O Cebreiro para atender o hospital que se construíu a finais do século IX co fin de atender as necesidades dos peregrinos.

Ao longo da historia foron moitos os monarcas que degustaron este queixo, entre eles, os Reis Católicos, Carlos III  e Isabel de Portugal. Un produto que no século XVIII era o queixo máis caro de España, pagándose a libra a doce reais e doce maravedís, e o cuarto máis caro de Europa, despois de "Brie" e "Marolles" e os suízos "Neufchatel".

En cambio, en 1989 estivo a piques de desaparecer, sendo un grupo reducido de mulleres as únicas que o facían para autoconsumo nas súas casas.

 

No ano 1990 xorde a primeira queixería artesanal e no ano 1991 concédeselle a Denominación de Produto Galego de Calidade. Ao longo destes anos tratouse de dalo a coñecer, ofrecendo un produto de coidada presentación e exquisita calidade, introducindo garantías hixiénico-sanitarias sen perder todos aqueles elementos tradicionais e artesáns que o fan peculiar e característico. Un produto totalmente natural ao que non se lle engaden conservantes nin aditivos.

A zona de produción, tanto de leite como de queixo, da Denominación de Orixe Protexida Cebreiro está constituída pola área xeográfica que comprende os municipios de Pedrafita, O Caurel, Cervantes, Triacastela, As Nogais, Navia de Suarna, Becerreá, Baralla, Baleira, Castroverde, A Fonsagrada, Láncara e Samos.

 

Na actualidade, son catro os produtores acollidos á Denominación de Orixe Protexida Cebreiro: Queixerías Castelo de Brañas, S.L., Carmen Arroxo Valcárcel (Queixos Xan Busto), Carlos Reija Fernández (Sto. André) e Enrique Fernández Paradela (Marqués de Cernadas).

Estes queixos elabóranse a partir de leite natural e enteiro, procedente de gando vacún autóctono, concretamente das razas Loura Galega, Pardo-Alpina e Frisoa.

Aínda que existen dúas variantes, queixo fresco e curado, actualmente unicamente se comercializa a primeira, cunha maduración mínima de 48 horas. Esta non presenta cortiza diferenciada, a masa é branca e granulada, branda, argilosa ao tacto, untuosa e fundente ao padal. O seu sabor e aroma lembran aos do leite da que procede, lixeiramente acedo.

 

Máis información en Queixo do Cebreiro