Tenreira Galega

De interese

Usos culinarios:

A Tenreira Galega pódese preparar:

Asada: Dourando primeiro a carne con aceite de oliva virxe extra sobre lume vivo, ata que se forme unha lixeira codia exterior que reterá o seu zume. Logo, introducir no forno máis ou menos quente, en relación inversa ao grosor da peza. Ásase sempre coa súa capa de graxa cara abaixo. Para que quede máis zumarenta, pódese regar o asado con caldo de carne, viño ou simplemente auga con herbas aromáticas, segundo o gusto que desexemos conseguir.

Estufada ou guisada: Primeiro, dourar a carne en aceite de oliva virxe extra. Poñer nunha braseadora con fondo de hortalizas, regar con viño e deixar reducir. Engadirlle caldo ou auga, se fose necesario, e prolongar lentamente a cocción.

Frita: Cocíñase en abundante aceite moi quente para que resulte dourada por fóra e zumarenta por dentro. As carnes salteadas elabóranse con pouco aceite e a lume non moi alto.

Empanada: Con fariña, ovo e pan relado. Frítese en abundante aceite.

Á prancha: Untar o fondo da tixola con aceite de oliva e, cando estea moi quente, facer os filetes volta e volta. Pódese aproveitar o zume que queda na tixola, desengraxándoo cun pouco limón, viño ou caldo.

Á grella: Nunha prancha de ferro, ou ben sobre unha grella con brasas de carbón vexetal ou no grill do forno. Para elaborar carne á grella, o lume debe ser vivo e debe estar moi quente. Régase con aceite e non se lle dá a volta á peza ata que estea moi dourada. Evítese sempre o contacto directo das chamas coa carne.

Outra das formas máis utilizadas na nosa cociña, que ademais constitúe un dos nosos estandartes culinarios, é o cocido, no que non pode faltar un bo anaco de vitela.

Tamén é importante destacar a súa utilización noutro prato moi famoso da nosa cociña, como é a carne ao caldeiro, sen esquecernos da richada ou a croca, dous pratos típicos da zona de Forcarei.