Gastronomia de Galicia 

Canelóns de Capón de Vilalba

Elaboración

Queimamos toda a pluma que lle queda ao capón e torámolo, cortando as ás en 2, as coxas en 3 e as peitugas en 3 anacos.

Salpimentamos e fritimos o capón ata que colla unha bonita cor dourada. Reservámolo para despois.

Nunha pota, sofriximos abundante cebola, cortada en media xuliana cuns allos en láminas. Deixamos cociñar ata o punto que a cebola se desfaga.

Engadimos o capón dourado e refogamos con Brandy e viño branco.

Tapamos e deixamos que se faga a lume lento, controlándoo cada dez minutos e engadindo o caldo feito previamente coas carcasas de polo e unhas verduriñas.

Pasadas 2 horas, unha vez rematado, arrefriamos e reservamos.

Unha vez frío, desosamos e salteamos cunhas verduriñas (cabaciña e cenoria), engadíndolle un pouco de xugo de carne resultado de triturar a salsa do guiso pasada por un coador fino.

Laminamos a masa de pasta fresca e cortamos ao noso gusto en forma rectangular. Enchemos da mestura do refogado a lume vivo do polo coas verduras e cocemos ao vapor durante 3-4 minutos.

Relamos queixo San Simón por enriba e gratinamos.

Por último emplatamos o canelón e salseamos co xugo de carne.

 

ingredientes (4 pax.)

Canelóns de Capón de Vilalba

 

Para o guiso:

  • Un capón
  • 4 cebolas
  • 3 dentes de allo
  • Brandy
  • Viño branco
  • Sal e pementa
  • Aceite
  • Queixo San Simón

Para o refogado a lume vivo:

  • 1 cabaciña
  • 1 cenoria
  • Xugo da cocción
  • Aceite

Para a pasta:

  • 1 kg fariña
  • 6 ovos

relacionados

<< retorno